Magischs Comeback

Ä magischi Nacht – es Comeback mit grosse Emotione.

Wenn sich im Ziel d’Träne mitem Räge mische, de hesch öbis richtig gmacht. Genau dä Momänt hani vom Fritig ufe Samschtig ir Nacht z‘ Biel dörfe erläbe – zäme mit mire Abentürfründin Laura. Mi letscht Louf isch genau  voreme Jahr ou in Biel  gsi. Nachdäm hani guet 8 Monet verletzigsbedingt kei Loufschueh meh treit - nid trainiere. Umso emotionaler und vor auem närvöser bini am Fritig im Startblock gstange. Es isch absolut nid säubschtverständlich, dasi überhoupt wieder ä Starnummere ha chönne alege. D‘Therapie (abem Februar) vom Daniele hets mir ermüglecht zrügg id Loufschueh z gah. Doch ohni mi Coach, Motivator und Begleiter Reto wär das Projekt nid umsetzbar gsi. Er het d Trainings uf mi abstumme, mi gforderet, mi brämset wes het müesse si und immer a mi gloubt. D Zytspanni bis zum Renne isch sehr churz gsi, aber er hets gschafft mi physisch und mental optimal vorzbereite, damit mir es unvergässlechs Comeback glingt. Er het mir ä Pace und Zyt vorgäh, woni no nie gloffe und für mi unerreichbar het tönt. Doch er het gwüsst, dasis schaffe und immer a mi gloubt. Danke für dini top Arbeit – danke für dini Ungerstützig. Fröie mi uf die nächschte gmeinsame Plän mit dir.

Das ig die 21.1 km mitere 04:50 Pace somit  i 1h42min ha dörfe schmärzfrei loufe verdank öich!

Bielerlauftage 2025

Und wenn dänksch es cha nüme besser cho, de hesch d Rächnig ohni dini Beschtefründinne gmacht. Mitte ir Nacht, im Dunkle, im Räge stöh die beide Andrijana und Ilona am Strasserand und si di gröscht Support. Ihri Emotione hei mir Flügu verleiht, extra Power gäh und Gänsehut gschänkt. Dir heit mis Härz / mi Puls grad nomau höcher lah schlah – mit öich isch d Nacht no magischer worde.

Es witers Merci geit a Perroulaz füre Getränke / Produkte-Support. Dr Isopro het mi einisch meh  begleitet und pushet.

SOL-ID öie Schueh het aui mini Erwartige übertroffe. Ä absoluti Ragette hani unger dä Füess gah, dank öire Beratig.

Ä Momänt für d Ewigkeit. Danke AUNE für die grossi Ungerstützig und z Mitfiebere - bi überwältig und unendlech dankbar.